Edishon # 2 di 2025

No ta ku un hende ta habri su wowonan un mainta i pensa: ban, awe mi ta lanta mi mes negoshi. Ta mas probabel ku esaki ta resultado di un proseso gradual ku un hende ta pasa aden a base di su eksperiensia i den loke el a pasa den bida i trabou. Un dia e idea pa un dia skohe pa un empresa di dje mes ta kuminsá forma den su kabes. No semper mesora di un empresa – pero si algu ku e mes por generá sufisiente entrada pa kumpli ku su obligashonnan. Ta ora e bai pensa mas profundamente kon e por yega na e meta ei, e ta haña riba su tayó e diferente opshonnan ku tin, esta‘ eenmanszaak’, NV, BV, etc. Ke men, ora ta yega e momento ku e tin ku selektá e struktura ku pa su kaso ta esun mas apropiá. Segun por a lesa den e último edishonnan di Empresa Chikí, no ta nada straño ku e otro aktividat ta kuminsá komo hòbi di un hende. Poko-poko esei ta bai eksigí

mas i mas tempu, energia i plaka di e persona envolví ku e tin ku disidí kiko pa hasi: sigui ku e aktividat na banda, òf tuma e kurashi pa laga e otro kos( trabou, estudio, etc.) para i konvertí e mes komo empresario nobo.

Na momento ku e drenta e fase ei e persona mester kuminsá buska tur sorto di informashon relevante pa e sa kiko e tin di hasi, pero tambe ta den kiko e ta bai hinka su kurpa. Laga nos ta franko for di salida: éksito no ta garantisá. Ku otro palabra, lanta algu di bo mes semper ta enserá sierto riesgo.

Bo por ta maestro den loke bo ta hasi, pero si bo sa organisá tur loke tambe ta bini ku un negoshi di bo mes, ainda bo por slep. Ademas, awe un idea pa un sierto negoshi por mustra bon, pero mayan merkado por kambia, anto e ora ei ta bira mas difísil pa tene kabes riba awa. Kuantu empresa no a haña nan den problema serio por ehèmpel durante e pandemia di Covid? Tur kos a bai plat pa basta tempu. Sin reserva tabata un doló di kabes di otro mundu pa no sukumbí. Danki Dios nos a laga esei tras di nos.

Pero wak tambe kiko ta pasando aktualmente rònt mundu. Gobièrnu Merikano a tuma e paso pa subi tarifa riba produkto ku nan ta importá. Pa Kòrsou tambe. Esaki por tin su efekto, pasobra nos ta dependé pa gran parti di importashon, entre otro for di Merka òf di otro manera atraves di Merka. En realidat nos ta importá muchu mas tantu for di Merka ku nos ta eksportá pa Merka.

Ta dependé den ki ramo bo ke ta aktivo, pero por tin sektor ku ta mihó warda un ratu pa wak kon kos lo desaroyá promé ku bo disidí den e mundu tumultuoso awor aki pa lanta un negoshi ku produkto òf servisio ku ta hopi bou di preshon a konsekuensia di e tarifanan nobo, mas ainda si pa Merka bo ke eksportá. Ta bini aserka ku islanan manera di nos ta haña e sla mas duru di un guera global di tarifa( entre e grandinan, manera China, Merka, Union Europeo, Canada, Meksiko, i otronan). Nos den Karibe, na Kòrsou, no por hasi mashá pa evitá su implikashonnan, si no plania alternativa na tempu.

Hustamente p’ esei ta bon pa sinta deliberá bon promé ku ta bai lanta un negoshi propio, pero e mesun vigilansia ta na su lugá ora ta manehando un empresa kaba.

Kontinuamente mester tin un bista manera ku wowo di falki riba desaroyo di merkado – tantu lokal komo afó komo ku esei di manera direkto òf indirekto por influensiá e merkado ku abo ku bo negoshi ta biba di dje. No por sera wowo pa e realidatnan di un ekonomia habrí, manera di nos, i nos tin di realisá ku nos mes no ta produsí tur kos( manera frizjidèr, outo, wasmashin, etc. pero tambe kuminda) i ku nos no mester di nada di otronan afó. Nos ta dependé grandemente di afó pa hiba un bida desente. Lo ta bon pa pensa kon por redusí e dependensia di otro merkado i kon nos mes por produsí mas; klaro na un preis kompetetivo i di bon kalidat.

Nos mester ta masha agradesido na tur e empresarionan ku un biaha mas tabata dispuesto pa konta nan storia asina personal ku tòg alabes por sirbi komo lès pa otronan ku ta hungando ku e idea pa un dia tambe lanta algu di nan mes. Lanta negoshi ta un riesgo – bo no sa presis kiko ta bai pasa – pero evitá di bula ku ala di manteka. Esei ta e lès primordial.

ta un publikashon di Kámara di Komèrsio i Industria di Kòrsou

Su meta ta pa informá i eduká empresario chikí pa e por sigui kontribuí na desaroyo ekonómiko di Kòrsou.

Redakshon: Tim di Kámara di Komèrsio huntu ku diferente kolaborador Telefon: 461-3918

Aviso: Enid van Meeteren Telefon: 736-5011 ae @ gojad. com

Imprenta:

De Stad N. V.

Kordinashon:

Intermediate N. V. Telefon: 737-1070

Tur derecho reservá Empresa Chikí